Don leat oktavuođas sihke doaktáriin ja audiográfain vuosttaš geardde go boađát beallje-, njunne-, čottaossodahkii. Doavttir iská du beljiid, ja audiográfa čađaha máŋggalágan mihtidemiid gulus. Dasto árvvoštallojuvvo dárbbašat go gullanapparáhta. Audiográfas lea earenoamáš máhttu audiologiija (oahppu gulu ja jienaid birra), gullanapparáhtaid ja eará audiologalaš biergasiid birra, ja movt daid sáhttá heivehit geavaheddjiide geain lea hedjonan gullu iešguđet láhkai.  

Audiográfa heiveha gullanapparáhta dan mielde movt dus lea hedjonan gullu, ja dan oaččut dasto luoikkasin. Don oaččut dárbbašlaš dieđuid apparáhta geavaheami ja buhtisdoallama birra. Vuosttašgeardde geavaheaddjis leat dávjá ollu jearaldagat. Váldde áinnas mielde muhtuma gii sáhttá veahkehit du muitit dieđuid maid oaččut, jus don dan háliidat.

Man guhká ádjána dikšu/iskkadeapmi?

Iskkadeami/divššu áigi sáhttá rievddadallat. Váldde oktavuođa iežat dikšunbáikkiin ja oaččo dieđuid iežat diimmu birra.

Audiográfa čuovvula geahččalanáigodagas du gullanapparáhta dárkkistemiiguin. Man galle dárkkisteami don dárbbašat, lea dan duohken movt geahččalanáigodagain manná.

Maŋŋel go oaččut gullanapparáhta, de sáhtát njuolga váldit oktavuođa gulluguovddážiin jus oaččut váttisvuođaid gullanapparáhtain, jus áiggut diŋgot diimmu dahje jus dárbbašat dan heivehit.

Jus gullanapparáhta leat ožžon priváhta audiográfas dahje šiehtadusspesialisttas, de fertet váldit oktavuođa dáinna spesialisttain go áiggut diŋgot bálvalusdiimmu.

NAV gokčá goluid ođđa gullanapparáhtaide juohke guđat jagi. Du audiográfa veahkeha du ohcamiin ja viidáset proseassain.

Lea du ovddasvástádus dáhkádusa ordnet gullanapparáhttii.