Mo fitne dulkka?
Hámmárfeastta buohcciviesus lea mis fásta davvisámegieldulka beaivet (08.00-15.00). Jus dus lea doavttirdiibmu Hámmárfeasta buohcciviesus beaivveáigge de ávžžuhat du ovdagihtii diŋgot dulkonbálvalusa. Go leat ožžon dieđuid diimmu birra Hámmárfeasta buohcciviesus, de sáhtát riŋget dulkii diŋgot diimmu ovdagihtii, tlf. lea 915 98 117. Sáhtát maiddái váldit oktavuođa dainna ovttadagain gosa galggat ja doppe de diŋgojit dutnje dulkka.
Lea maiddái vejolaš oažžut dulkka go joavddat buohccivissui, muhto lea ovdamunni jus ovdagihtii leat jo diŋgon, go de mii diehtit lea go sus vejolašvuohta dulkot. Dát guoská maiddái daid pasieanttaide geaiguin lea divššodandiibmu beaivet spesialisttapoliklinihkas Álttás dahje spesialisttadoavttirguovddážis Kárášjogas. Doppe čađahuvvo dulkon videokonferánssa (skype) bokte.
Hámmárfeasta buohcciviesu dulkkas lea maid vejolašvuohta dulkot pasieanttaid ovddas geat leat sisačálihuvvon buohccivissui. Čakčamánu rájes álggahuvvo geahččalusortnet ja sisačálihuvvon pasieanttaiguin lea vejolašvuohta fitnet dulkonveahki maŋŋilgaskabeaivve, eahkedin ja vahkkoloahpain. Dalle čađahuvvo dulkon videokonferánssa (skype) bokte ja de lea davvisámegielat dulka fidnemis olles vahko gaskkal dii. 08.00 gitta 22.00 rádjai.
Mii plánet maiddái ahte pasieanttat geaiguin lea oktavuohta ambulánsabálvalusain dahje psyhkalaš dearvvašvuođasuddjen ja gárrendille ossodagain galgá leat vejolašvuohta oažžut davvisámegielatdulka ođđajagimánu 2017 rájes. Lea maiddái plánejuvvon ahte pasieanttain geain lea diibmu dahje sisačálihuvvojit Girkonjárgga klinihkkii ožžot seammalágan dulkonfálaldagaid 2017 čavčča.
Manne galgá sámegielat dulkka geavahit?
Jus sámegiella lea du eatnigiella de lea dus vuoigatvuohta sámástit go deaivvadat dearvvašvuođalágádusain.
Finnmárkku buohcciviesus leat olu bargit geat eai máhte sámegiela, danin leage dehálaš váldit atnui dulkka. Lea erenoamážit dehálaš geavahit dulkka doavttirdiimmuid oktavuođas dahje eará dilálašvuođain gos dehálaš dieđut gaskkustuvvojit gaskkal pasieantta ja dearvvašvuođabargi.
Go olmmoš lea buozas de ii leat álohii nu álki muitit nubbingielat sániid. Buohcciviesus sáhttet fáttát ja sátnegeavaheapmi leahkit váddásat go árgabeaivvegiella. Hušša, ballu, bákčasat, dálkasat jna. sáhttet dasa lassin hedjonahttit du návccaid áddet ja muitalit dieđuid nuppi gillii.
Oapmahašagát ožžot áinnas leahkit mielde go galggat guorahallamii ja dikšui, muhto mii eat ávžžut sin geavahit dulkan. Dulkon gáibida máhtu dearvvašvuođafágalaš sániide ja iige leat álohii nu álki lagasolbmuide gaskkustit dieđuid. Min dulkkat barget dulkonehtalaš prinsihpaid mielde ja sis lea jávohisgeatnegasvuohta.
Čálit
Oktavuohta