​Ane Kokkvoll

Ane Kokkvoll lea riegádan 1965:s ja lea bajásšaddan Askeris, goappašat váhnemat leaba Plassjes eret. Son lea oahppan Cand. med. Romssa Universitehtas 1993:s ja sus lei turnusbálvalus Namsos buohcciviesus ja Nærøy gielddas. 1996:s 1998:i lei son gielddadoavttirin ja dearvvašvuođastašuvdnadoavttirin Os gielddas Davvi-Østerdalas. Son álggii doavttirin mánáiddávddaid oahpahusvirggis Finnmárkku buohcciviesus 1998:s. 2004 ođđajagimánu oaččui son spesialiserema pediatriijas ja lea dan rájes leamaš bistevaš virggis váldodoavttirin Hámmarfeastta mánáidossodagas.

Managing Childhood Obesity ­– The Finnmark Activity School

Ovdaskuvlamánáid searvvis geat leat riegádan gaskal 1999–2000 Finnmárkkus lei 16 % gánddain ja 22 % nieiddain buidodat. Dan čájehedje dieđut maid dearvvašvuođastašuvnnat Finnmárkkus ledje čohkken 1779 ovdaskuvlamáná gaskkas. Dikšundutkosis Doaibmaskuvla Finnmárkkus gessojuvvo 97 bearraša 6 gielddas Finnmárkkus ja Romssa suohkanis searvat "Ovttaskasbearaš"- dahje "Máŋggabearaš"-fálaldahkii. Ovttaskasbearaš-fálaldagas deaivvadedje bearrašat buohccidivššáriin, mánáiddoaktáriin ja klinalaš borramušfysiologain mánáidpoliklinihkas, ja lei čuovvoleapmi dearvvašvuođabargi luhtte. Sii geat ledje mielde Máŋggabearaš-fálaldagas besse dasa lassin deaivvadit eará bearrašiiguin ja fágaidrasttildeaddji joavkkuin mánáidossodagas ja ožžo čuovvoleami dearvvašvuođabargi luhtte joavkkuid mielde. Organiserejuvvojedje vahkkosaš lášmmohallanfálaldagat mánáide ja olgodaddanskuvla dáidda bearrašiidda. Maŋŋá guokte jagi eat gávdnan statistihkalaš erohusaid gaskal dikšunjoavkkuid dasa mii guoskkai čoahkkisvuođa rievdademiide. Mánáin geat ledje Máŋggabearaš-čuovvoleames lei buoret ovdáneapmi seakkášmihtuin, ja buidodaga dáfus ledje sis maiddá buoret logut Ovttaskasbearaš-čuovvoleami ektui. Goappašiid dikšojoavkkuin unnui buidodat ja sii celke maiddá buorráneami daid psykalaš dearvvašvuođa mihtuid ektui.

Loga dutkosa neahtas