E-poasta: Kari.Milch.Agledahl@unn.no
Kari Milch Agledahl
Kari Milch Agledahl lea riegádan Bådåddjos 1973:s ja bajásšaddan Hámmarfeasttas. Son gárvii doavttiroahpu Romssa Universitehtas 2001:s ja gárvii filosofiija váldofága 2005:s mas lei medisiinnalaš etihkka váldofáddán. Son lea leamaš PhD-stipendiáhta Davvi Dearvvašvuođas 2006 rájes dassážii go gárvii dutkosa 2011:s. Son lea dál virgáiduvvon Davvi-Norgga Universitehtabuohcciviesu čalbmeossodagas. Juolludeamit Davvi Dearvvašvuođas ja Finnmárkku dearvvašvuođas ruhtadedje doavttergrádaprošeavtta.
Morally bound medical work – an empirical study exploring moral conditions of doctors' everyday practice
Go jo medisiinnalaš barggu ulbmil lea veahkehit pasieanttaid, de lea buot medisiinnas maiddá morálalaš bealli. Fágasuorggi medisiinnalaš etihka (bioetihkka) váldovuolggasadji dattege lea filosofiija ja juridihka, ja lea unnán deattuhuvvon dálá doaktáriid doaimmain. Dát lea dagahan gaskka gaskal fága medisiinnalaš etihka ja medisiinnalaš doaimma. Doavttirgráda ulbmil lei čalmmustahttit mo doaktárat gieđahallet morálalaš beliid mat dábálaččat dagahit ipmirduvvon ja oaidnemeahttun oasi medisiinnalaš doaimmas. Áicamat ja jearahallamat doaktáriiguin dábálašdoavttirdoaimmas ja buohcciviesus ja geahčadeapmi videobáddemiin doavttir-pasieanta konsultašuvnnain buohcciviesus ledje diehtoávnnasin dutkosis.
Dutkos čájehii ahte doaktárat dušše bidje deattu medisiinnalaš áššiide go deaivvadedje pasieanttaiguin, vaikke pasieanttas sáhtte leat vuorjašumit mat ledje eanet čadnon persovnnalaš osiide eallimis, nu mo ovdamearkka dihte jus balle barggu massit. Doavttir hilggui pasieantta persovnnalaš vuorjašumiid systemáhtalaččat. Doaktárat ges sin bealis geahččaledje veahkehit pasieanttaid dan bokte ahte geavahedje iežaset biomedisiinnalaš máhtu anatomiija ja orgánadoaimmaid birra. Lei morálalaš movttiideapmi mii jođihii doaimmaid. Muhto dat dagahii maiddá ahte doaktárat dávjjit gieđahalle pasieanttaid medisiinnalaš objeaktan. Hilgojuvvot ja gieđahallot objeaktan, lea morálalaš duolbman mii sáhttá leat unohas vásáhus pasieantta mielas. Doaktárat eai orron oaidnimin iežaset morálalaš duolbmuma, soaitá sivvan dasa lea go bisuhedje guoibmás hállanvuogi konsultašuvnnas. Dutkkus geažádallá sihke dan ahte morálalaš duolbmuma lea veadjemeahttun garvit medisiinnalaš doaimmas, muhto maiddá ahte doaktárat berrejit diehtigoahtit makkár unohasvuođaid dát sáhttá dagahit ja mo dan sáhttet geahpedit.
Loga dutkosa neahtas