Eahpesávahahtti pasieantadáhpáhusat

Dieđáhusat eahpesávahahtti pasieantadáhpáhusaid birra Dearvvašvuođadirektoráhttii

Dearvvašvuođadoaibman leat mii lága bokte geatnegahtton dieđihit duođalaš dáhpáhusaid birra. Dat guoská sihke dáhpáhusaide mat duođas leat dagahan ahte olbmot leat duođalaččat hávváduvvon ja dáhpáhusaide mat livčče sáhttit dagahit dan.

Dát dieđáhusat gohčoduvvojit "3-3-dieđáhussan" spesialista­dearvvaš­vuođa­bálvaluslága § 3-3 mielde, mii čilge dieđihangeatnegasvuođa.

Rabasvuohta eahpesávahahtti dáhpáhusaid birra lea eaktun vai sáhttit árvvoštallat oppalaš árvvu dan dearvvašvuođafálaldagas maid mii addit. Rabasvuohta addá maiddá pasieanttaide vejolašvuođa bisuhit realisttalaš vuordámušaid dasa maid dearvvašvuođabálvalus sáhttá čoavdit.
2012:s ledje Finnmárkku buohcciviesus badjel 67 000 pasieantaoktavuođat. Eanaš dáin oktavuođain mannet nu mo galget, muhto soames dilálašvuođain leat geavvan eahpesávahahtti dáhpáhusat mat leat dagahan ahte pasieanta oaččui dahje livčče sáhttit oažžut hávvádeami.

Finnmárkku buohcciviessu almmuha anonymiserejuvvon veršuvnnaid buot 3-3-dieđáhusain maid mii sáddet Dearvvašvuođadirektoráhttii. Spiehkastahkan leat dieđáhusat mat leat iešsorbmemiid ja eará erenoamáš sensitiiva dáhpáhusaid birra maid ii sáhte doarvái bures anonymiseret.

3-3-dieđáhusaid almmuhandáhton ii leat seamma go dáhpáhusa dáhtun. Dieđáhusat almmuhuvvojit go leat gárvásit gieđahallojuvvon Finnmárkku buohcciviesu kvaliteahttaorgánain ja sáddejuvvon Dearvvaš­vuođa­direktoráhttii.
Mii almmuhat dieđáhusaid 5 geardde jahkái. Juohke dieđáhus merkejuvvo jahkeloguin, almmuhanáigodagain ja áššenummiriin min kvaliteahttavuogádagas.
Omd.. 2013/5 – 611508

Mii merket dáhpáhusaid duođalašvuođadásiin:

  1. Ii mearkkašahtti
  2. Vuollegis
  3. Gaskadássi
  4. Duođalaš
  5. Hui duođalaš/kritihkalaš

   Dieđihanortnega birra (Helsedirektoratet.no)