Sámi dearvvašvuođasiida

Finnmárkku buohcciviessu háliida nannet dearvvašvuođafálaldaga sámi álbmogii.
ILO-konvenšuvnnas eamiálbmogiid vuoigatvuođaid birra čuožžu ahte eamiálbmogiin lea vuoigatvuohta leat mielde plánet ja hálddašit iežaset dearvvašvuođabálvalusaid. 

Davvi Dearvvašvuohta RHF:s lea Našunála dearvvašvuođa- ja buohcciviessoplánas ožžon doaibman gozihit ovddasvástádusa sámi álbmoga spesialistadearvvašvuođabálvalusaid ja addán Finnmárkku buohccivissui bargobihttán čielggadit čohkket gelbbolašvuođa ja ovdánahttit somáhtalaš spesialistadearvvašvuođabálvalusa sámi álbmogii Davvi-Norggas. Mii háliidat ásahit Sámi dearvvašvuođasiidda, masa mii čohkket spesialistadearvvašvuođabálvalusaid somatihkas, psykalaš dearvvašvuođasuddjemis ja gárrendilledivššus sámi álbmogii ovtta sadjái. 2016 miessemánu mearriduvvui bidjat johtui Sámi dearvvašvuođasiidda jurdda- ja konseaptaáigodaga.

Spesialistadoavttirguovddážis Kárášjogas lea odne liikespesialista, sismedisiinna doavttir, gulloguovddáš ja laboratoriijabálvalusat. Dasa lassin fállat mii johtti bálvalusaid; dákteriggerøntgen, beallje-, njunne- ja čottaspesialista, leasmedávddaid spesialistadoavttir, gynekologa ja mánáiddoavttir. Fálaldat lea álgovuolggalaččat sámi pasieanttaide ja pasieanttaide geat gullet dan viđa gildii mat leat sámi hálddašanguovlluin (Guovdageaidnu, Porsáŋgu, Kárášjohka, Deatnu ja Unjárga).

SÁNAG:s - Sámi našuvnnalaš gealboguovddáš - psykalaš dearvvasvuođasuddjen ja gárrendilledikšu - Kárášjogas leat gealboguovddášdoaimmat psykalaš dearvvašvuođasuddjemis ja gárrendilledivššus olles sámi álbmogii Norggas ja psykiatriijalaš doaimmat buohkaide Gaska-Finnmárkkus. Gealboguovddáš lea ovttaidahtton oassi Finnmárkku buohcciviesu spesialistadearvvašvuođabálvalusas.

Jurdda- ja konseaptaáigodagas galgá somáhtalaš spesialistadearvvašvuođabálvalusaid ođđa visti sisdoallu čilgejuvvot ja ráddjejuvvot bálvalusfálaldagaid, ekonomiija ja čađaheami dárbbuid ektui. Jurdda- ja konseaptaáigodaga doaimma boađus galgá leat loahpalaš konseapta vistái ovdal huksenáigodat álggahuvvo.

Áigeplána

  • Jurdda- ja konseaptaáigodat loahpahuvvo ođđajagimánu 2017
  • Ovdaprošeaktaáigodat loahpahuvvo borgemánu 2017
  • Huksenáigodat loahpahuvvo 2018/2019