Ásahan fitnangáržžádusa

Sámi klinihkka ásahan fitnangáržžádusa eastadan dihte Covid-19 njoammuma.

Sámi klinihkka čuovvu dearvvašvuođadirektoráhta ráđiid, ja danne bidjet johtui gáržžidemiid olbmuide fitnat min buohcceviesuin ja dikšunbáikkiin. Buot Sámi klinihka viesuin lea fitnangáržžádus. Dat mearkkaša ahte dušše sii geat leat sisačálihuvvon dahje sis geain lea šiehtadus besset boahtit vistái. Sámi klinihkka ii váldde vuostá eaŋkilolbmo dahje joavkkuid oahpisteapmái.

Pasieanta guovddážis 

Dasa lassin lea Sámi klinihkka bidjan johtui eará doaimmaid. Klinihkkahoavda, Amund Peder Teigmo muitala ahte sii čuvvot álbmotdearvvašvuođainstituhta ráđiid ja ávžžuhusaid. Skype ja telefovdna lea olu ánus dál, muhto son deattuha ahte pasieanta lea ain guovddážis. 

-Mis lea buohkain dehálaš servodatbargu. Lea stuorra rievdadeamit, muhto min bargu lea ain seamma: Pasientii láhčit buorre dili. Mii áigut dálkkodit daid geat dárbbašit spesialistadearvvašvuođabálvalusaid, muhto mii galgat suddjet servodaga vuorrasiid ja sin geat ovddežis leat buohcan, dadjá Amund Peder. 


Ávkkálaš liŋkkat 

Covid-19 geažil lea Finnmárkku buohcciviessu fiskes gearggusvuođas. Geahča min gearggusvuođasiidduid: 
Beredskap
Helsenorge siiddus gávnnat vástádusaid koronavirus gažaldagaide:

Álbmotdearvvašvuođainstituhtas lea dieđut dearvvašvuođabargiide ja álbmogii.


Lea go dus gažaldagat koronavirusa birra? Geahča fhi.no. Jos it gávnna vástádusa doppe de sáhtat riŋget dán nummarii: 815 55 015. Telefovdna lea rabas árgabeivviid gaskkal 8:00 – 15:30. 
Jos don jáhkat ahte dus lea Covid-19, váldde oktavuođa doaktáriin.