SÁNAG lea ráhkadan e-oahpahuskursa mii addá vuđolaš máhttu sámi servvodaga, historjjá, kulturheivehuvvon gulahallama ja áddejumi birra. Kursa ulbmil ii leat dušše bajidit máhttu sámi diliid birra, muhto maiddái ahte olbmot galget smiehttat makkár guottut sis leat ja mo sii láhttejit go deaivvadit sámi pasieanttain ja geavaheddjiin. Vaikke kursa lea sámi diliid ja kultuvrra birra, de mii oaivvildat ahte kursa sisdoalu sáhttá fievrridit eará dáhpáhusaide maid.

Máttasámi dilit ja dearvvašvuohta​

Dasa lassin almmuhuvvo maid e-oahpahuskursa “Máttasámi dilit ja dearvvašvuohta", kursa galgá bajidit máhttu máttasámi historjjás, diliin ja mo dát čuohcá  dearvvašvuođadeaivvadeapmái.  Snåase gielda lea ovttas SÁNAG:n ráhkadan dán kurssa.

SÁNAG:s lea našuvnnalaš ovddasvástádus ovddidit ovttadássásaš bálvalusaid psyhkalaš dearvvašvuođas ja sorjjasvuođas sámi álbmogii. Ovttadássásaš fálaldat mearkkaša ahte dearvvašvuođa- ja fuolahusbálvalus váldá vuhtii sámi pasieanttaid ja geavaheddjiid dárbbuid, sihke gielalaš ja kultuvrralaš heivehuvvon bálvalusat. SÁNAG lea vásihan ahte sámi pasieanttat muitalit ahte dearvvašvuođa- ja fuolahusbálvalusain ii leat sámi kultuvra ja giella máhttu. Dát vásáhusat leat váikkuhan min buvttadeapmái go mii ráhkadišgođiimet dán kurssa.

E-oahpahusportála​

E-oahpahuskursa lea rabas buohkaide SÁNAG e-oahpahusportála bokte: esanks.no. Don ráhkadat geavaheaddji ja sáhtát váldit buot e-oahpahuskurssaid maid SÁNAG lea ráhkadan. Kurssaid sáhttá váldit vaikke ii bargga dearvvašvuođa- ja fuolahusbálvalusas.

E-oahpahuskurssat leat njuovžilis  čovdosat go áigu bajidit iežas máhttu. Ii dárbbaš dihto áiggiid dahje beivviid váldit kurssa. Don sáhtát vaikko goas mannat olggos kurssas, ja go fas manat kurssa sisa de álggát doppe gos heitet.

Kurssa sáhttá váldit dihtora, telefovnna dahje dihtordulbosa bokte. Otná dilis go lea ruovttokantuvra, mátkkoštangáržžideapmi jna. de sáhttá kursa leat buorre fágalaš deavdda nu ahte bajida iežas máhttu.

Prošeaktajoavku​

Prošeakta álggii 2015:s ja lea leamaš máŋga proseassas dán rádjai. Máŋggas leat leamaš oassin prošeavttas. Sii geat leat oassálastán:

Prošeavtta jođiheaddji Renathe Aspeli Simonsen

Prošeavtta mielbargit: Henriette Joks, Elin Anita Sivertsen, Johanna Unga, Ann-Karin Furskognes, Majjen Eira, Anne Silviken, Elisabeth Gerhardsen, Anja Tiller, Tonje Samuelsen, Inger Marit Eira-Åhren, Marit Normyr Utsi, Per Martin Westerfjell, Elen Ravna Krogh ja Gunn Heatta.