Kantuvrra gávnnat Storgata 69:s. Psykologa Lill-Tove Veimæl lea doppe váldimin vuostá pasieanttaid. Son illuda bargat SÁNAG kantuvrras Tromssas ja lea gearggus bargagoahtit.

– Mun lean hui ilus go lean ožžon dán barggu, šaddá gelddolaš leahkit mielde álggahit kantuvrra Tromssas, dadjá Veimæl.

Tromsa lea okta dain gávpogiin Norggas gos orrot eanemus sápmelaččat, ja Lill-Tove mielas lea áibbas lunddolaš ahte SÁNAG:s lea fáladat doppe.

– Dál ožžot sámi pasieanttat Tromssas fálaldagaid mat lea gielalaččat ja kultuvrralaččat heivehuvvon, dat lea hui dehálaš, muitala Lill Tove Veimæl

Našuvnnalaš joavku
SÁNAG – Sámi klinihkka lea dál virgáibidjamin bargiid našuvnnalaš jovkui Tromsii, ja doaivumis fálaldat lea jođus giđđat/geasset 2022. SÁNAG PDS/FSD ovttadatjođiheaddji Edit Johnsen muitala ahte SÁNAG guhká lea háliidan rahpat kantuvrra Tromssas.

– Mis lea guhkit áiggi badjel leamaš mihttu viiddidit fálaldaga nu ahte guoská Tromsii maid, danne go guovllus orrot olu sápmelaččat. Dál leat vuos guokte virggi čadnon dán kantuvrii, dadjá Edit Johnsen.

Áiggi miel šaddá maid vejolaš čujuhit ollesolbmuid Tromsii, dál álggos lea fálaldat mánáide ja nuoraide vuollel 18 jagi.​

Davvi dearvvašvuohta lea ruhtadan
Guokte jagi áigi ruhtadii davvi dearvvašvuohta guokte virggi duohtavuođa- ja seanadankommišuvnna bargguid ektui. SÁNAG lea addán doarjjaságastallamii olbmuide geat leat juohkán persovnnalaš historjjáid dáruiduhttima ja vearrivuođa birra. Kommišuvdna lea dál loahpahan barggu gos čohkkejit njámmálaš historjjáid.

– Virggit galge sirdojuvvot Tromsii go mii loahpaheimmet duohtavuođa- ja seanadankommišuvnna bargguid. Prošeakta lea dál fargga loahpahuvvon ja mis lea dál kapasitehta rahpat kantuvrra Tromssas, lohká Edit Johnsen.​

Čujuheapmi

Čujuheami SÁNAG Tromssa kantuvrii vuolggaha doavttir, psykologa dahje mánáidsuodjalusbálvalus. Čujuheapmi sáddejuvvo vuostáiváldinkantuvrii Kárášjohkii, sii veardidit jos lea dárbu veahkkái:

SANKS Karasjok
v/ lokasjon Tromsø
Postboks 4
9735 KARASJOK​