Go eadni dahje áhčči buohccá

Go eadni dahje áhčči oažžu duođalaš buozalmasvuođa de dat dábálepmosit mielddisbuktá stuorra hástalusaid nuppi váhnemii.

​Go lea váldoovddasvástádus mánáide duođalaš buozalmasvuođa oktavuođas de sáhttá leat lossat. Galggat áimmahuššat mánáid nu bures go vejolaš, sihke dovdduid ja praktihkalaš doaimmaid dáfus. Árgabeaivvi smávva ja stuorra doaimmat fertejit čuovvolahttojuvvot dilis gos ollu lea rievdan ja mas leat ollu vuorjašumit. Lea dávjá nu ahte don leat doarjjaolmmožin sutnje guhte lea buohcamin. Máŋgga dilálašvuođas leat maiddá oktavuođaolmmožin dearvvašvuođabálvalussii ja dus lea rolla diehtojuohkinguovddážin bearraša fierpmádahkii.

Iežas dovddut, vuorjašumit ja dárbbut sáhttet dalle gártat maŋimuš áššin maid dus lea vejolašvuohta vuoruhit. Lea dábálaš ahte dovdá iežas ráđeheapmin, vuoimmeheapmin ja okto dákkár dilálašvuođain.

Ii oktage dilálašvuohta leat justa seammalágan go nubbi dilálašvuohta, ja ii oktage olmmoš reagere justa seamma láhkái. Goitge leat sullasašvuođat dilálašvuođain ja muhttin ráđit gusket eatnašiidda. Muitte ahte ii oktage sáhte nagodit buot visot álo ja ahte doarvái buorre lea doarvái buorre. Muitte ahte sáhtát oažžut veahki.

Don dárbbašat dieđuid

Dieđut dávdda ja divššu birra ja oppalašgeahčastaga oktavuođaolbmuin, sáhttá addit dutnje einnostahttivuođa ja bearráigeahčču dilis. Dearvvašvuođabargiin lea ovddasvástádus addit dutnje dáid dieđuid. Ávžžuhuvvo ahte don, son guhte lea buozas ja dikšojoavku deaivvadehpet johtilit.

Jus son guhte lea buozas ii hálit ahte don galggat oažžut dieđuid, de sáhtát lihkká váldit oktavuođa dikšojoavkkuin čielggadan dihte áššiid. Dus lea vuoigatvuohta oažžut oppalaš ráđiid ja evttohusaid mo don galggat hálddašit dilálašvuođa, makkár vuoigatvuođat dus ja mánáin leat, ja mo buoremusat sáhtát mánáid fátmmastit ja áimmahuššat.

Fuomáš ahte áigodagain sáhttá leat dutnje váttis fáhtet mii daddjo. Lea dávjá ávkkálaš ráhkkanit čoahkkimiidda, ja ovddal gihtii smiehttat makkár jearaldagat dus leat. Čále áinnas čoavddasániid. Dávjá sáhttá leat buorre doarjjan dutnje váldit mielde nuppi rávisolbmo mielde go deaivvadat dearvvašvuođabálvalusain. Sáhtát bivdit eanet čoahkkimiid.

Evttohusat maid sáhtát jearrat

  • Geat leat dikšojoavkkus ja geas lea ovddasvástádus masa?
  • Maid sáhtán oažžut diehtit dávdda ja divššu birra?
  • Goas oažžut mii dieđuid - goas váldojit mearrádusat?
  • Makkár vuoigatvuođat leat mus/mis?
  • Makkár fálaldagaid ja čuovvoleami sáhttit mii, mun ja mu mánát, oažžut?
  • Gii sáhttá veahkehit mu hállat mánáiguin?
  • Maid galggan dadjat sidjiide min fierpmádagas, skuvllas ja mánáidgárddis?
  • Makkár fálaldagat gávdnojit doppe gos mii orrut?
  • Gos gávnnan eanet dieđuid?
  • Goas galgat mii fas deaivvadit?

Eanet dan birra go eadni dahje áhčči buohccá (Helsenorge.no)