– Winter is coming!

Hámmárfeasta: Winterfell 2017 hárjehallan

Lea erohus olbmuid gaska: Dan botta go eatnašat Finnmárkku buohcciviesus barget buot maid nákcejit vai pasieanttadivššodeapmi ja guorahallamat manašedje njuovžilit bárttiid haga, de seammás pláneba Marie Røeggen ja Hanne Iversen mo buot manašii ges endorii.

- Iskka iežat ossodaga gearggusvuođaplána, ávžžuheaba Marie Røeggen ja Hanne Iversen.

​Eatnašat liikojit go barggut mannet njuovžilit plánaid mielde: Girdit seivot rievttes áiggiide, fatnasat jovdet káijii, ambulánsa beassá duoddariid badjel ja pasieanttat jovdet buohccivissui nu go galget, sii ožžot dan veahki maid dárbbašit ja jovdet fas ruoktot dearvan.  

– Mii diehtit dieđusge ahte nu ii dáhpáhuva gal álohii. Muhtomin girdit eai loktan, meara alde sáhttá garra dálki nu ahte fatnasat eai borjjas, duoddaris soitet gidden luottaid dálkki geažil ja de sáhttá šaddat dievas moivi. Muhtomin gevvet stuorra lihkohisvuođat ja visot de jorgása. Mii fertet ráhkkanit bures diekkár dáhpáhusaide. Diet han gohčoduvvo ge gearggusvuohta.

Bahávuođa nilkkisteapmi

Don soaittát fuomášan ahte Marie Røeggen ja Hanne Iversen suollemasat nilkkisteaba go váccašeaba buohcciviesus. Soai oainnat pláneba dán dálvvi roasuide. Hutkás vuogi mielde leaba soai plánemin mo buohcciviesus beasašedje hárjehallat mo roasuid oktavuođas čoavdá hástalusaid. Eaba gal hálit vel muitalit plánaid birra.

– Mii galgat sihke hárjehallat ja geahččaladdat dan gearggusvuođa, muitala Røeggen. – De leage hui dehálaš dahkat hárjehusaid realisttalaš vuogi mielde, ovdamearkka dihte dan ahte mii eat ovdagihtii beasa diehtit mii dat galgá dáhpáhuvvat.

– Gearggusvuohta mearkkaša ge ahte mii fertet leat bures hárjehallan ja ráhkkanan dakkár dilálašvuođaide mas eat dieđe mii dáhpáhuvvá, lasiha Iversen. – Mii leat oalle čeahpit birgehallat vuorddekeahtes dáhpáhusaiguin, muhto gávdno álohii buoridanmonni. Mii han diehtit ahte dat vearrámus dilálašvuođat sáhttet čuožžilit juohke sajis, maiddái min guovlluin. Dasa mii fertet ge ráhkkanit. Dan sivas letne ge dál plánemin stuorra gearggusvuođahárjehallama dán dálvve.

– Moai ávžžuhetne Hámmárfeasta buohcciviesu bargiid iskat iežaset ossodaga gearggusvuođaplánaid.  

– Gearggusvuođaplánain oainnat earret eará CBRNE- prosedyraid ja giehtagirjji NBC-medisin**. Ávžžuhan bargiid logastit dieid, muitala Iversen. 

– "Nasjonal veileder for masseskadetriage" lea maid ávkkálaš dokumeantta, lasihastá vel Røeggen.

Dát dálvi ii šatta nugo eará dálvvit:

Winterfell lea boađi boađi!

Leat go dus gažaldagat Winterfell hárjehallama ektui?

 

Marie Z Røeggen
Gearggusvuođakoordináhtor Hámmárfeasta buohcciviessu
Marie.Constanse.Zachariassen.Roeggen@finnmarkssykehuset.no

Hanne Iversen
Váldodoavttir
Hanne.Rikstad.Iversen@finnmarkssykehuset.no

Winterfell hárjehallama váldomihtut:

  • Gearggusvuođaplána
  • UMS-dieđiheapmi
  • Oktanasvuohta
  • Roassovuostáiváldin
  • Masseskadetriagering

 

* kjemihkalaš, biologalaš, radiologalaš, nukleæra, bávkkanas
** Nukleæra, biologalaš, kjemihkalaš