Álgoálbmotdearvvašvuohta guovddážis go fágačeahpit deaivvadit riikkaidgaskasaš konferánsii Austrálias

Álgoálbmotdearvvašvuođa njunuš fágačeahpit deaivvadit The Lowitja Institute International Indigenous Health and Wellbeing Conference 2016 mii lágiduvvo Melbournes skábmamánu 8. – 10.b.. SÁNAG jođiheaddji Gunn Heatta searvá maiddái dán lágideapmái.

Instituhta jođiheaddji Romlie Mokak, Gunn Heatta, Siv Kvernmo ja Per Axelsson gii bargá Upmis, Ruoŧas.

Konferánssa fáddá lea " identitehta, máhtolašvuohta, fápmu", ja konferánssa ulbmil lea čohkket álgoálbmogiid miehta Austrália ja máilmmi ávvudit, juogadit ja nannet álgoálbmotmáhttu.

Lea Lowitja Institute mii lágida konferánssa. Dat lea Austrália našuvnnalaš instituhtta mii bargá Aborginal ja Torres Strait Islander dearvvašvuođaguorahallamiin. Instituhtta lea njunnošis Austrálias dasa mii guoská álgoálbmotdearvvašvuhtii seammás barget sii miehtá máilmmi álgoálbmogiid ovddas globálalaš ovttasbarggo bokte. Instituhta jođiheaddji Romlie Mokak lohká konferánssa čohkket miehtá máilmmi álgoálbmotfágačehpiid ja dát addá sidjiide vejolašvuođa hábmet buoret boahtteáiggi. Dáppe lea maid vejolašvuohta juogadit máhttu ja oahppat guđe guoimmistis. 

SÁNAG jođiheaddji Gunn Heatta ja Siv Kvernmo guhte lea professor mánáid ja nuoraidpsykiatriijas searvaba dán konferánsii.

-Moai letne guokte sámi ovddasteaddji, mun ja Siv Kvernmo. Moai illudetne sákka dáidda beivviide. Šaddet miellagiddevaš čoahkkimat ja ságastallamat álgoálbmogiiguin miehtá máilmmi.

Oahppat ja lonuhit vásáhusaid

Gunn Heatta lea dán dearvvašvuođakonferánssa oktavuođas bovdejuvvon doallat sártni, mas fáddán lea SÁNAG ja Sámi dearvvašvuođa siida. Sártnis lea erenoamáš fokus "Meahcceterapiija" divššodanfálaldahkii. Dát lea birasterapiija mii lea vuođđuduvvon sámi arvvuide, doaimmaide ja lundui. Dán fálaldaga jođiha Nuoraidpsykiatriija ovttodat Kárášjogas.

- Lea stuorra gudnin munnje beassat doallat sártni dán dehálaš konferánssas, SÁNAG jođiheaddji namas. Lea dehálaš ahte mii álgoálbmogat maid beassat lonohallat vásáhusaid ja  oahppat nubbi nuppis vai pasieanttaid ja oapmahašagiid dilli buorránivčče. Midjiide geat bargat gealbobálvalusas lea dutkan ja gealbogaskkusteapmi hui dehálaš. Lowitja Institute lea dehálaš álgoálbmotdutkan ásahus. Nubbe mihttu dáinna tuvrrain lea maid ásahit oktavuođaid singuin ja maiddái eará dehálaš dutkanásahusaiguin.

Eambbo dieđuid gávnnat dás: http://lowitjaconf2016.org.au/