Bargiide fállo nuvttá influeansa­boahku­heapmi

Preassadieđáhus Finnmárkku buohcciviesus

Dál fas lahkona influeansaáigodat. Finnmárkku buohcciviessu fállá dán jagi nuvttá eaktodáhtolaš boahkuheami áigodatinflueanssa vuostá buot bargiide.

Bargiide fállo nuvttá influeansaboahkuheapmi
Illustrašuvdnagovva: Scanpix / NTB

​Manne berrejit dearvvašvuođabargit boahkuhit iežaset?

Lagabuidda miljovnna olbmo Norggas gullet joavkkuide geaidda lea eanet várra oažžut váttisvuođaid influeanssa dihte. Lea árvaluvvon ahte gaskamearálaččat jápmet 900 olbmo Norggas jahkásaččat dávdda dihte. Influeansaboahkuheapmi sáhttá suddjet máŋgasa sis.

Lea čielggas ahte dearvvašvuođabargiin lea stuorát várra njoammut influeanssas go buohtastahttá sin rávisolbmuiguin geat eai bargga dearvvašvuođasuorggis, ja sis lea dasto maiddá stuorát várra njoammudit pasieanttaid ja earáid.

Alla boahkuhanlohku dearvvašvuođabargiid gaskkas sáhttá unnidit loguid influeansa guoskevaš váttisvuođaide ja muhttin dilálašvuođain eastadit ahte pasieanttat jápmet. Dát lea erenoamáš dehálaš pasieanttaide geain lea hedjonan immunsuodjalus ja geaidda sáhttá leat nu ahte influeansaboahkuheapmi ii leat seamma beaktil. Muhttin olbmot eai oba sáhte ge oažžut boahkuheami, ovdamearkka dihte mánát vuollel 6 mánu. Ahte leat olu bargit dearvvašvuođasuorggis geat leat boahkuhuvvon lea maiddá dehálaš bisuhan dihte dohkálaš gearggusvuođa jus influeansa leavvá viidát.

Man vuostá suddje boahkuheapmi?

Boahkuheapmi áigodatinflueanssa vuostá suddje iešguđetlágan influeansavirusiid vuostá. Influeansaboahkuheapmi ii suddje eará virusiid ja bakteriijaid vuostá mat maiddá sáhttet addit influeansalágan dávdamearkkaid. Dábálaš dávdamearkkat go lea influeansa lea feber, guorssahat, njunni golgá, veajuheapme, oaivebávččas ja ahte deahkit verket, mat bistet 3-10 beaivvi.

Leatgo boahkuheamis liigeváikkuhusat?

Boahkuheapmi áigodatinflueanssa vuostá lea geavahuvvon máŋggaid jagiid. Nu go eará boahkuheamit de sáhttá šaddat rašši, ruvssodit ja bohtanit gokko lea čuggejuvvon, ja sáhttá oažžut febera, dovdat veajuheapmin ja ahte deahkit verket. Allergiijalaš reakšuvnnat dahje eará duođalaš liigeváikkuhusat leat hui hárvenaččat. Áigodatinflueanssa boahkuheamis eai leat dat seamma seagadasávdnasat go pandemiijaboahkuheamis (Pandemrix). Influeansaboahkuheapmi ii sáhte addit influeansadávdda

Ávžžuhus njoammudávddaid eastadeami ráđis

Njoammudávddaid eastadeami ráđđi ovddasta fágaolbmuid geat erenoamážit barget njoammudávddaid eastademiin Finnmárkku buohcciviesus. Sii leat čielgasit rávven doaimmahaga jođiheapmái ahte buot bargiide berre fállojuvvot nuvttá boahkuheapmi ja berrejit ávžžuhuvvot boahkuhit iežaset.

–  Dál go influeansaáigodat lahkona, lea ávkkálaš sihke bargiide ja pasieanttaide ahte nu ollu go vejolaš bargit mis boahkuhit iežaset influeanssa vuostá. Nu unno vejolašvuohta njoammudeapmái sin gaskkas geat eai leat boahkuhuvvon sihke bargiid ja pasieanttaid gaskkas, dadjá ráinnasvuođabuohccidivššár Hege Lundmark

– Mii geat leat dearvvašvuođabargit sáhttit leat veahkkin unnidit riskka ahte min pasieanttat njoammuduvvojit influeanssain dan bokte ahte boahkuhat iežamet, vaikke vel mis alddámet soaitá leat buorre dearvvašvuohta ja ii leat stuorra riska jus oažžut influeanssa, lasiha njoammudávddaid eastadeami doavttir Pál Ivan.

Oktavuohta

Hámmarfeasta:

Pál Ivan
Njoammudávddaid eastadeami doavttir
T 78 42 16 40 | M 909 85 716 | pal.valter.ivan@finnmarkssykehuset.no

Hege Lundmark
Ráinnasvuođabuohccidivššár
M 974 08 327 | hege.lundmark@finnmarkssykehuset.no

Girkonjárga:

Anita Brekken
Ráinnasvuođabuohccidivššár
T 78 97 31 86 | M 934 87 154 | anita.brekken@finnmarkssykehuset.no

Preassagovva

(Deaddil govaid, de ihtet stuorát veršuvnnat govain)

Sykepleier får vaksine
Illustrašuvdnagovva: Scanpix / NTB
 
Portrettfoto av Pal Ivan
Njoammudávddaid eastadeami doavttir Pál Ivan
Govva: Torgrim Halvari

Portrettfoto av Hege Lundmark
Ráinnasvuođabuohccidivššár Hege Lundmark

Portrettfoto av Anita Brekken
Ráinnasvuođabuohccidivššár Anita Brekken
 
Influeansaboahkuheami vuođđogelbbolašvuohta (Álbmotdearvvašvuođainstituhtta) (dárugillii)