​Otná olbmot leat urbánat!

Orro dainna lágiin ahte dat rivttes olmmoš lea álohii urbána ja buohkat geat orrot boaittobealde leat eksohtalaččat, nu čujuha Fors iežas kronihkas. Olbmo heajubealli lea nugo diehtit ahte oaidná iežas árgabeaivvi dego máilmmi guovddážis, nu oaivvilda Fors ja čujuha Kopernikus guhte 1543 suorggahii olles máilmmi go čuoččuhii ahte lea beaivváš iige eana mii lea guovddážis. Kopernikusa girji hárddii nu sakka ahte lei lobiheapme katolalaš kirku bokte gitta 1835 rádjai. Otná olbmot leat urbána ja badjelgehččet boaittobealeguovlluid, čuoččuha Fors. Son geavaha doahpaga geográfalaš narsissisma govvidit stuorragávpogiid badjelgeahččama.

"Go jo leat oahpahallamin dárogiela de gal galggašit oahppat albma dárogiela, it ge dien davvinorggasuopmana" lea okta dain kommentárain maid son lea dolkan gullamis.

"Ii hal oktage gillešii Hámmárfestii ássat guhkitáigái? Ii han dat leat báiki gosa ásaiduvvá? Lea diekkár báiki gos orusta oanehaš boddii: eksohtalaš báiki man ii dárbbaš duođalaččat váldit. Dáppe beassá bivdit, oaggut, ja váris váccašit ja de fárre fas ruoktot dan albma máilbmái" Nu son čállá kronihkas.

Urbána norpmat

Psykologaspesialista lea maid dolkan go psyhkalaš dearvvašvuohta ja divššodeapmi definerejuvvo urbána duohtavuođa mielde. Fors muitala kronihkas ahte dain urbána psykologiija oahppogirjjiin ii čuoččo mo fállat terapiija go geainnut leat gitta dahje go leat guhkes gaskat. Orrut smávit servvodagain buktet áibbas eará hástalusaid go maid stuorra gávpogis leat, muitala son. Servvodagain gos buohkat dovdet buohkaid de sáhttá leat olu váddásut beassat eret áššiiguin maid dáhtošit guođđit. Ovdamearkka dihte sosiála fobiija sáhttá mearkkašit áibbas eará boaittobealeguovlluin go urbána máilmmis. Seammás sáhttet olu eará ovdamunit orrut lagas ja čađačuovgi servvodagas, muhto dán birra ii čállojuvvo fágagirjjálašvuođas. Urbána anonymitehta lea gártan dat norbma.

Fors maiddái problematisere dan urbána jurdaga máhttu mii muhtomin idealisere hui baskkes spesialiserenfágasuorggi. Son deattuha dan erenoamáš gelbbolašvuođa mii leat guovddážis boaittobealguovlluid divššodeamis nugo, fleksibilitehta, oppalašvuohta, konteakstajurddašanmálle mii dađistaga sihkkojuvvo eret.

Ii oktage dearvvašvuođabargi guhte dáhttu bargat boaittobealeguovlluin sáhte bargat hui unna fágasurggiin dahje dušše ovtta diagnosain. Mii geat bargat boaittobeale fertet máhttit olu ja máhttit jođánit logastit ođđa hástalusaid birra ja maiddái leahkit njuovžilat bargguid dáfus. Mii fertet leat čeahpit doallat stáđisvuođa ja oahpahit gaskaboddosašbargiid ja áidooahppan fágabargiid. Mii fertet máhttit áššiid bidjat oktii ja váldit vuhtii dálkki, biekka ja báikkálaš dilálašvuođaid. Bargan boaittobealde gáibida fleksibilitehta, duostilvuođa, vejolašvuođa atnit máŋgga lágan čalbmeglásaid oktanaga ja klinihkárat bággejuvvojit máhttit máŋga fágasuorggi birra" Nu čállá Fors kronihkastis.

"Muhtomin son guhte goaivu beare čiekŋalit, loahpas ii šat geahča siidui" joatká son kronihkas mas čujuha urbána máhtolašvuođaideálii.

Álgovuolggalaš ruoŧa urbánlaš

Psykologaspesialista lohká iežas leamašan ruoŧa urbánlaš psykologa gii dál lea orrun Hámmárfeasttas ovcci jagi. Son lohká iežas oaidnigoahtán dan urbána máilmmi eará ládje. Urbána máilbmi addá boaittobealguvlui muhtinlágan trauma go dat ii váldde dán duohtavuođa duođalažžan, oaivvilda son.

Dutká geográfalaš narsissisma birra

Malin Fors ii duđa dušše oaivvildit olu urbána ovdagáttuid boaittobealeguovlluid vuostá. Golggotmánus ovdanbuvttii son dutkanbarggu mas fáddá lei geográfalaš narsissisma ja urban bias psykoterapiija, stuorra riikkaidgaskasaš traumakonferánssas Washingtonas.

- Mun dáhtun bidjat sániid daidda traumaide maid boaittobealeguovllut álohii šaddet gillát go urbána máilbmi čađa gaskka badjelgeahččá min. Mun dáhtun muitalit ahte Hámmárfeasta ja Finnmárku lea guovlu gosa sáhttá ássat, lohká Fors.

Malin Fors

Malin Fors lea psykologaspesialista klinihkalaš psykologiijas, psykoterapiija rávisolbmuidpsykiatriija poliklinihkas Hámmárfeasttas, Finnmárkku buohcciviesus. Son bargá dál dr philos- prošeavttain mas fáddá lea váldi ja psykoterapiija. 2016 giđa vuittii son American Psychological Associations  girjegilvvu «Tabin Book Proposal Prize» iežas mánusevttohusa ovddas  «A Grammar of Power in Psychotherapy». Vuoitu lei girjealmmuhankontrákta APA Books:ain ja 1000 USD.

Golggotmánus ovdanbuvttii son iežas dutkosa "Geographical narcissism: Addressing the urban bias in psychotherapy and psychoanalysis"  George Washington University:as Washingtonas.

Preassagova

Oktavuohta

Malin Fors
malin.fors@mac.com