Lea sáhka ovttaskas doaktára, buohccidivššára gelbbolašvuođas, ja ovttasdoaibmama gaskal dearvvašvuođabargiid buohcciviesuin, gaskal buohcciviesu ja gielddaid ja heahteetáhtaid gaskkal. Lea Finnmárkku doavttersearvi mii vállje geasa bálkkašupmi geigejuvvo. Ná čilgejit bargoustibat manne Iversen lea rivttes "Dán jagáš Finnmárkku doavttir 2015»:
«BEST-konseapta (Buoret vuogádatlaš joavkohárjehallan) lea dovddus miehtá Norgga ja muhtin muddui olgoriikkas. Measta buot buohcciviesut riikkas hárjehallat heahtedilálašvuođaid BEST-konseapta mielde. Finnmárkkus lea mis gielda-BEST, mánáid-BEST, njuoratmáná-BEST, trauma-BEST, riegádahttin-BEST. Studeanta-BEST galgá ovdánahttot.
Doalahan dihte áŋgiruššama dáid dehálaš hárjehallamiidda gáibiduvvo duohta buollisearra. Lea ollu maid ferte dahkat, mearehis ollu, plánet ja čađahit dáid hárjehallamiid jagi miehtá. Dán jagáš nammaduvvon vuoiti lea máŋga jagi leamaš diehttelas "generála" ja stivren máŋga bures čađahuvvon hárjehallama. Sihke stuorra hárjehallamat dego "operasjon Raggsokk" mas buollindoaimmahat, politiijat, Boreal, gielddadearvvašvuođabálvalus ja buohcciviessu - traumajođihangottiin - leat searvan, ja unnit hárjehallamat, dego "dårlig barn" mánáidossodagas. Hárjehallamat leat maiddá fágaidrasttildeaddji, eaige leat ráddjejuvvon guoskat dušše doaktáriidda.
Nammaduvvon olbmos lea njulgestaga measta čiegus vásáhusgelbbolašvuohta plánet ja čađahit juohke lágan dáhpáhusaid mat sáhttet geavvat.
Mii geat bargat dearvvašvuođadoaimmahagas soaitit veaháš bahán hárjánan, ja eatge oainne buot dan barggu mii lea dákkár fáhkka diliid hárjehallamiid čađaheami duohken ja mii dagaha ahte mii dearvvašvuođabargin sáhttit leat oadjebasat fáhkka dilálašvuođain. Dattetge oinniimet iežamet speadjalis go dán jagáš nammaduvvon vuoiti lei njunnošis čađahit duohta trauma-BEST-hárjehallama lávddis AKS:s Hámmarfeasttas ovtta stuorra, našunála konferánssas oljoealáhussii. Lei oalle mielahis jurdda dahkat dan, muhto lea dábálaš ahte nammaduvvon vuoiti ii oainne hehttehusaid, muhto vejolašvuođaid čájehit iežas bargosaji gelbbolašvuođa. Ii leat eahpádus ahte geahččit Ole Olsen-sálas ledje hirpmástuvvan ja duhtavaččat. Nammaduvvon háliidii gaskkustit ahte Finnmárkkus lea buorre fáhkkagearggusvuohta - ja su sáttasátni bázii oljoealáhusa muitui. Eat mii leat stuorrát, muhto dan mii buhtadat hárjehallamiin!
Fáhkkagearggusvuohta lea leamaš stuorra ja dehálaš fáddá, mii lea digaštallon juohke lágan našunála digaštallanbáikkiin olles 2015 čađa. Go dearvvašvuođaministtar, stáhtačálli ja našunála buohcciviessoplána ovddasteaddjit leat galledan Finnmárkku, de lea min fáhkkagearggusvuođa vuoruheapmi deattuhuvvon. Ja soaitá danne orru ge ahte mii Finnmárkkus beassat bisuhit sihke fáhkkakirurgiija ja eará fáhkkadoaimmaid. Nappo dát ii boađe nuvttá!
Mii leat sihkkarat ahte go Hámmarfeastta fáhkkaossodat lea deattuhan gearggusvuođa ja fáhkkadilálašvuođaid hárjehallamiid jagiid bokte de dat lea mearkkašan ollu bohtosii. Dan botta go earát leat leandán kantuvrraid mielde Oslos ja hállan akademalaččat fáttá birra, lea nappo min nammaduvvon vuoiti leamaš ruovttus ja dahkan árgabeaivvi doaimmaid doalahit fágalaš beali badjin. Dán son lea dahkan smiehtakeahttá nannet iežas CV dahje man ge láhkái iežas loktet. Lea baicce nu ahte su persovnnalaš áŋgiruššan lea leamaš nu garas ahte lea dahkan ollu iežas astoáiggis.»