Jus duostat jearrat, de dustet olbmot vástidit

Ođđa raporta veahkaválddi birra lagaš oktavuođain sámi servvodagas

Ođđa dutkanraporta mas fáddá lea veahkaválddi birra lagaš oktavuođain sámi servvodagas almmuhuvvui Sámedikkis riikkaidgaskasaš nissonbeaivvi.

Gova luoikkahan nkvts.no

​Ovdalaš dutkamat čájehit ahte leat eanaš nissonolbmot geat vásihit roavva veahkaválddálašvuođa lagas oktavuođain ja ahte sii vásihit olu hehttehusaid mat cagget sin ohcaleames veahki dahje váidimis veahkaválddi.  Dát dieđut dagahit ge vuođu dán dutkanprošektii. Prošeavtta ulbmil lea ovdan buktit dutkanvuđot máhtu veahkaválddi birra lagaš oktavuođain sámi servodagas.

Oažžun dihte buori áddejumi dán fáttá birra de válljejedje dutkit čađahit njeallje fokusjoavkku veahkkeapparáhta ja politiija bargiiguin geat barget sámi guovlluin. Dat oaivvilduvvo ahte fokusjoavku bargu lea buorre vuohki buvttadit ollu seammás go lea vuogas máhttolonohallan vuohki.

Myhta nana sámi nissonolbmo birra

Prošeavtta ulbmil lea bidjat fuomášumi servodatlaš, historjjálaš ja kultuvrralaš beliide mat sáhttet váikkuhit veahkaválddi dahkamii lagaš oktavuođain sámi servvodagas. Rapporta čájeha earret eará dasa ahte olu sápmelaččain lea unnán luohttámuš stuorraservvodahkii assimileren- ja dáruiduhttinpolitihka geažil.

Rapportas boahtá maid ovdán ahte fokusjoavku lea digaštallan ideála "albma sápmelaš" birra. Son galgá leat gievra ja gierdat buot. Dát namuhuvvo vejolaš sivvan dasa manin eambbogat eai dieđit veahkaválddi birra. Dás lea maid sáhka das ahte dát ideála lea dávjjimusat čadnon nissonolbmuide. Fokusjoavkku mielas lea áigi dál laddan dasa ahte myhta nana sámi nissonolbmo birra ii šat galgga beassat stivret mo nissonolbmot oidnet iežaset.

Rapporta "Om du tør å spørre, tør folk å svare" Hjelpeapparatets og politiets erfaringer med vold i nære relasjoner i samiske samfunn lea dutkanboađus maid Sámediggi initierii 2014. Dutkama lea Nationála máhttoguovddáš veahkaválddi ja traumáhtalaš huša birra (NKVTS) čađahan. Sámediggi ja Justiisa- ja gearggusvuođadepartemeantta leat ges ruhtadan prošeavtta.

Raporta gávnnat nkvts.no siiddus dahje dás