​Min pasieanttat sáhttet logget sisa našunála dearvvašvuođaportálii helsenorge.no:i ja doppe oidnojit earret eará journálanotáhtat ja čujuhusat.

Sávahahtti ovdáneapmi

Ahte pasieanttat besset elektronalaččat geahččat iežaset pasieantajournála lea ovdáneapmi man norgga eiseválddit leat háliidan. Stuorradiggedieđáhus Okta ássi, okta journála deattuha ahte norgga pasieanttat galget oažžut iežaset pasieantajournála elektronalaččat.

Finnmárkku buohcciviesus leaba Elisabeth Joks ja Nils Petter Hallonen guđet jođiheaba barggu ásahit "Mu pasieantajournála"

– Makkár rievdademiid buktá elektronalaš beassan journálaide dearvvašvuođabargiide geat čállet journálaid?

– Dál ožžot pasieanttat guđet dan sihtet, čálihuvvot iežaset journála buohcciviesus go bivdet dan, báhpárii dahje CD:i. Stuorra rievdadeapmi dearvvašvuođabargiide lea ahte pasieanttat sáhttet lohkat journáladokumeanttaid dalán go divššodeaddji lea daid dohkkehan. Leat olusat geat dáhttut diehtit makkár dokumeanttaid pasieanttat besset oaidnit, ja rievdadago dát čoavddus gaskavuođa gaskal divššodeaddji ja pasieantta. Mii fertet beare vuordit ahte bohtet eanet jearaldagat dihto áššiid birra journálas. Jus lea juoga maid pasieanttat eai ádde iežaset dearvvašvuođa birra, de lea sis vuoigatvuohta oažžut dan čilgejuvvot.

Muhttin dieđuid sáhttá čiehkat

Váldonjuolggadus lea ahte buot journáladokumeanttat galget leat olámuttos pasientii, muhto gávdnojit spiehkastagat. Ovdamearkka dihte de sáhttá leat veahkaválddálašvuohta gaskavuođas, dalle ferte navdit ahte pasieantta guoibmi maid beassá oaidnit journála.  Ođđasat veršuvnnas DIPS:s lea vejolaš merket dokumeanttaid dainna ahte dá leat dokumeanttat maid pasieanta ii galgga beassat oaidnit, nu guhká go lea láhkavuođđu dasa. Dearvvašvuođabargit ožžot dieđuid ja oahpahusa dán ektui.

Maŋidit dohkkeheami

Sáhttet leat dilálašvuođat goas divššodeaddji háliida hállat pasieanttain ovdal pasieanta lohká journála neahtas, ovdamearkka dihte go pasieanta áiddo lea ožžon duođalaš diagnosa. Sáhttet maiddá leat dilálašvuođat goas doavttir háliida iskat dilálašvuođaid buohcciviesu olggobealde, jus balahuvvo ahte lea veahkaválddálašvuohta lagaš gaskavuođain, ovdal pasieanta dahje ovddasteaddjit ožžot beassama journálii. Dákkár dilálašvuođain sáhttá divššodeaddji maŋidit dohkkehit journáladokumeantta dassá sii leat beassan hállat iežaset pasieanttain dahje loahpahit iežaset iskosiid.

Máŋga dási

Álggus galget pasieanttat Davvi-Norggas beassat oaidnit ja lohkat dábáleamos dokumeanttaid mat leat pasieantajournálas, ovdamearkka dihte journálanotáhtaid ja epikrisaid. Sii ožžot maid beassama oaidnit logga mii čájeha geat leat geahččan dihto dokumeantta. Røntgengovaid ja laboratoriijavástádusaid lea teknihkalaččat hástaleaddji čájehit, nu ahte dát eai leat dál álggus váldon mielde.

Davvi Dearvvašvuohta dáhttu viiddidit elektronalaš pasieantajournála nu ahte maiddá galgá sáhttit geahččat ja rievdadit diimmuid, ja ahte galgá sáhttet gulahallat álkit ja elektronalaččat buohcciviesuin. Dát bálvalusat sáhttet boahtit áiggi mielde.

Ovttasbargu earáiguin

Davvi Dearvvašvuođa prošeakta lea ovttasbargu gaskal máŋga oasálačča: Helsenorge.no/Helsedirektoratet, DIPS, Telemedisiinna našunála guovddáš, Davvi Dearvvašvuohta DGT, dearvvašvuođadoaibmahagat ja Davvi Dearvvašvuohta RHF.

Eanet dieđut siiddus helsenorge.no:s

Pasieantajournála ja geahčadeapmi