​Psyhkalaš dearvvašvuođasuddjen ja gárrendilledivššu mánáid ja nuoraid ovttadagat SÁNAG:s Kárášjogas juolluduvvojit Barnehelseprisen 2017. Lea Norgga mánáiddoaktáriidsearvi ja mánáidáittardeaddji mat juohkiba bálkkašumi heivvolaš kandidáhtaide. Dán jagi geigejuvvo bálkkašupmi mánáiddoaktáriidbeivviid (Pediaterdager) oktavuođas mat lágiduvvojit Bergenis.

Stuorát áddejupmi ja buoriduvvon práksis

Mánáid ja nuoraid ovttadagat Kárášjogas ožžot bálkkašumi go leat nannen psyhkalaš dearvvašvuođasuddjema kvalitehta ja go leat buoridan sámimánáid dearvvašvuođa Norggas. Bargiid guhkit áigge rahčamušat ja barggut dutkama, oahpaheami, bagadallama ja klinihkalaš bargguid oktavuođas namuhuvvojit dehálažžan bálkkašumi nammadeamis. Guovddáš lea maid seammás nagodan hukset transkultuvrralaš mánáid ja nuoraidpsykiatriija gelbbolašvuođa buori jođiheami bokte.

SÁNAG lea váikkuhan buoret práksisii ja stuorát áddejupmái daid fágasurggiiguin, mii fas lea dagahan ahte unnitloguálbmogiid mánáiddearvvašvuohta lea buorránan Norggas. 

Stuorra gudni ja movttiidahtti

SÁNAG:as vulget golbma bargi Bergenii vuostáiváldit bálkkašumi. Anne Karin Steffensen lea okta sis. Su mielas lea somá go sin ovttadagat ožžot ánssu ja dohkkehusa dan barggu ovddas maid sii barget sámi mánáid dihte miehta Norgga.

- 2005 rájes lea dát viđát geardde go juhket bálkkašumi, ja dat han dagaha dán nammadeami vel ain eanet erenoamážiin, muitala Steffensen. Okta gii ovdal lea ožžon dán bálkkašumi lea Jens Stoltenberg guhte oaččui boahkkudanfoandda barggu dihte.

Maiddái SÁNAG jođiheaddji Gunn Heatta mielas lea dát nammadeapmi stuorra gudnin. Dát movttiida min, sihke jođiheddjiid ja bargiid, ain joatkit bargat ovddidit sámi mánáid dearvvašvuođa.

- Mii movttiiduvvot joatkit bargguin váikkuhit dan guvlui ahte sámi kultuvra ja giellamáhttu stuorru.

Fákta

SÁNAG:a psyhkalaš dearvvašvuođasuddjen ja garrendilledikšu- mánáid ja nuoraid fálaldat lea juohkásan njealji ovttadahkii: Bearašovttadat, Mánáid- ja nuoraidpsykiatriija poliklinihka/ Johtti bargiidjoavku, Sámi nuoraidpsykiatriijajoavku/ fágaidrasttildeaddji spesialiserejuvvon gárrendilledikšu ja Nuoraidpsykiatriija ovttadat.

Goas: Pediaterdagene 2017, ođđajagimánu 20 b. Dii. 11.10

Gos: Barne og ungdomsklinikken, Bikuben, Bergen

Oktavuođadieđut

Gunn Heatta
M 411 20 546

Anne Karin Steffensen
M 934 34 336

Preassagovat

_{(Deaddil govvii oččodan dihte stuorát gova)}