Našunála bargojoavku ožžon ođđa bargi Plassjii

SÁNAG ásaha vuosttaš geardde kántursaji Plassjii, máttasápmái. Našunála bargojoavku oažžu de ođđa bargi, namalassii Hanne Svinsås Magga guhte bargagoahtá terapevtan.

Hanne Svinsås Magga

​Hanne Svinsås Magga lea 48 jagi, lea bajásšaddan boazosámebearrašis ja sus lea gullevašvuohta sihke Mátta-Várjjagii ja Plassjii. Hanne lea oahppan psykiátralaš buohccidivššár. Son lea bargan fáhkkapsykiatriijabuhcciiguin Åsgårdas Romssas 2003 rájes gitta 2013 rádjai. Lea maid gaskkohagaid bargan infekšuvdnabarggus. 2013 rájes lea Hanna jođašan iežas guovtti ruovttu Romssa ja Plassje gaskka ja lea bargan vikárafitnodaga ovddas ja maiddái ruovttubálvalusas.

Hanne lea orron eanaš iežas rávisolbmoeallima Romssas ja su gullevašvuohta Plassjii dagahii ahte háliidii ohcat dán bargui.

– Plassjes beasan orrut lagabuš boazodoalu ja luonddu. Mu bearrašis lea maid sámi biebmobáiki gos mii ráhkadat árbevirolaš sámi borramuša bohccobierggus.

Áŋgiruššá buoredit dearvvašvuođafálaldaga

Hanne muitala iežas barggu bokte Åsgårdas deaivan ja bargan olu sámi pasieanttaiguin. Son áŋgiruššá ge ahte sámi pasieanttat galggašedje dovdat oadjebasvuođa dearvvašvuođalágádusain sihke vuođđo- ja spesialistadearvvašvuođabálvalusas.

Hanne muitala ahte bargu SÁNAG:s addá vejolašvuođa bargat áššiiguin mat sutnje leat dehálačča, namalassii váikkuhit ovdánahttit dearvvašvuođafálaldaga sápmelaččaide. Našunála bargojoavku lea máŋga jagi jođašan iešguđetge sámi guovlluin, earret eará Plassjii. Dán sii leat dahkan vai sáhtašedje fállat sápmelaččaide kulturheivehuvvon dearvvašvuođafálaldaga. Hanne mielas lea ge hui buorre máttasámeálbmogii, go dál lea ásahuvvon kántorbáiki Plassjii.

– Dat fálaldat mii dál lea fidnemis máttasámiguovllus lea hui váilevaš ja mu mielas leage hui miellagiddevaš dál beassat váikkuhit hukset ođđa fálaldaga Plassjii.

Lassin pasieanttadivššodemiin de lea maid dárbu ásahit ovttasbarggu gielddadearvvašvuođabálvalusain daid iešguđetge gielddaiguin muitala Hanne.

 – Sámi pasieanttat šaddet dávjjimusat deaivvadit vuođđodearvvašvuođabálvalusain iežaset árgabeaivvis. Ja doppe leage hui unnán máhttu sámi kultuvrra birra ja daid hástalusaid birra mat máttasápmelaččaiguin sáhttet leat, oaivvilda Hanne.

Loahpalaččat jáhkká Hanne ođđa barggu šaddat sihke miellagiddevažžan ja hástaleaddjin. Erenoamáš somá lea beassat ásahit áibbas ođđa kánturbáikki Plassjii. Hanne bargogođii guovvamánus ja su kántorbáiki lea gávdnamis Tollef Bredals vei 13, Røros.

Mii sávvat sutnje bures boahtin ja lihkku ođđa bargguin!

Našunála bargojoavkkus lea dál bargit Divttasvuonas, Áhkánjárggas, Snåases, Plassjes, Bådåddjos ja Plassjes.

Loga eanet Našunála bargojoavkku birra