​SÁNAG doallá oahpistankurssa maid buot ođđa bargit fertejit čađahit. Kursa lea guovtti oasis. Vuosttaš oasis besset bargit oahppat eanet SÁNAG:a organiseremii. Nugo rutiinnat, strategiijaplána, bargiidpolitihkalaš njuolggadusat. Bargit ožžot maid eanet dieđuid našunála gealbobálvalusbargguid birra. SÁNAG jođiheaddji Gunn Hetta ja DjO ovttadaga ráđđeaddi Renathe Simonsen čađaheaba kurssa.

Maŋŋil vuosttaš kursaoasi, bovdejuvvojit bargit nuppi oassái. Nuppi oasi fáddá lea kultursensitivitehta go deaivvada sámi pasieanttaiguin. Dás láhččojuvvo ságastallamiidda ja reflekšuvnnaide oasseváldiid gaskka. Dán oasis čájehuvvo maiddái filbma mii galggašii čilget ja čájehit veahá dan máŋggadáfotvuođa mii lea čadnojuvvon identitehtii ja historjái. Já dát oasit sáhttet ge váikkuhit go deaivvada sámi pasieanttaiguin muitala kurssaovddasvástideaddji, DjO ráđđeaddi Renathe Aspeli Simonsen.

SÁNAG servvodatovddasvástádus lea váikkuhit ahte sápmelaččat oččošedje ovttadássásaš dearvvašvuođafálaldaga psyhkalaš dearvvašvuođasuddjemis ja gárrendilledivššus. Dát geatnegahttá ahte mis leat bargit geaiguin lea gelbbolašvuohta sámiid dárbbuid ektui oažžut gielalaš ja kultuvrralaš heivehuvvon divššu ja veahki.  

Kultursensitivitehta go deaivvada sámi pasieantan

Olu SÁNAG bargiide lea oahpistankursa vuosttaš deaivvadeapmi sámi kultuvrrain ja vuosttáš geardde gos kulturáddejupmi lea guovddážis. Mii diehtit ahte gávdno unnán diehtu sámi kultuvrra birra vuođđo- ja joatkkaskuvllain Norggas. Ii ge leat olus eanet diehtu dán birra go jotket oahpu gazzamin allaskuvllain ja universitehtain, muitala Simonsen. Váikko vel oahppoásahusat leat álgán deattuhit kultuvrra ja dearvvašvuođa, de lea lihkká unnán gelbbolašvuohta sámi pasieanttaid, geavaheddjiid ja oapmahaččaid birra dearvvasvuođabálvalusas.

- Oahpistankursa lea dehálaš min ođđa bargiide, dás besset oahppat mo SÁNAG:s vuhtiiváldit sihke kultuvrra ja dearvvašvuođa.

Lean ožžon olu iešguđetlágan ruovttoluottadieđuid bargiiguin maŋŋil kursa ja dat vulget maid das makkár kulturduogáš sis lea. Ovdamearkka dihte hirpmástuvvet oaluhat go gullet makkár váikkuhusat pasieanttaiguin sáhttet leat dáruiduhttináigodaga geažil. Váikko dát almmolaččat jo nogai 1960-logus. Ja bargit geaiguin ges lea sámi duogáš sáhttet muitalit iežaset vásáhusaid birra mii addá ges earáide gova sin sámi identitehta birra.

Eatnašiiguin leat reaiddut mo dikšut pasieanttaid geat eai leat oarjemáilmmi gullevačča. Muhto dávjá vásihit sii hástalusaid go deaivvadit sámi pasieanttaiguin. Dasa sáhttá ágga leat ahte sápmelaččaid ii oainne álkidit bajil, go sis eai leat nu gárrá etnalaš dovdomearkkat. Dasa lassin sáhttá stuorraálbmot jurddašit ahte sápmelaš lea nu sajáiduvvan servvodahkii ja de vajálduhttá smiehtastit ahte sus soaitá eará eatnigiella ja eará máilmmioaidnu go eará norgalaččain.

Danin leage buorre go SÁNAG:s sáhttit mii fállat dákkár kurssa. Kursa oahpista ja sáhttá láidestit bargi reflekteregoahtit ja jurddašit das mo sáhtášii fállat kultursensitivitehta deaivvadeami pasieantta árvvuid ja ovdagáttuid ektui. Kursa sáhttá maid buktit čilgehusa mo sápmelaččat jurddašit omd. buozalmasvuođa birra, loahpaha Simonsen.