Ođđa bargi bargagoahtá Plassjes

SÁNAG Našunála bargojoavku lea ožžon ođđa bargi Plassje kantuvrii. Johan Inge Greff bargagoahtá terapevtan ja Plassjes leat dál guokte bargi.

Johan Inge Greff

​Johan Inge Greff, 50 jagi, bajásšaddan julevsámi bearrašis Hápmiris/Divttasvuonas/Mo i Ranas. Greff lea oahppan spesialista buohccidivššár ja sus lea joatkkaoahppu bearaš- ja joavkoterapiijas, kognitiiva terapiijas ja psykososiála barggus. Sus lea maid studeanttaid bagadallangelbbolašvuohta bearašterapiijas, njuorat- ja smávvamánáid psyhkalaš dearvvašvuođas ja mánáid ja nuoraid kognitiivva terapiijas. Johan Inge Greff muitala su bargan mánáiguin, nuoraiguin ja bearrašiin nu guhká go leamašan terapevta.

– Mu fágalaš beroštupmi lea bargat mánáiguin, nuoraiguin ja olles bearrašiin.

Maiddái Náste lea divššus mielde

Greff muitala iežas sámi duogáža ja jurddašanmálle álohii leamašan guovddážis go lea terapevtan bargan.

– Mu sámi duogáš lea stivren mo mun jurddašan ja barggan áššiiguin. Mus lea álohii sámi jurddašanvuohki mielde go fálan divššu, maiddái dalle go lean olggobeale sámi bargan. Ovdamearkka dihte de deattuhan stuorra bearraša divššus ja geahččalan čoavdit áššiid veahá eará ládje go dat mii soaitá dábálaš Norggas.

Johan čilge su bargat bearašterapevttalaš lahkoneami vuogi mielde. Earret eará de son geahččá mo son sáhttá bargat pasieantta fierpmádagain, omd. fierpmádatčoahkkimiid bokte, fitnat pasieantta skuvllas dahje ruovttubirrasis. Johan muitala maid luonddu leahkit dehálaš oassi go son fállá divššu nuoraide.

-Doaibmá hui bures ávkkástallat luonddu terapiija oktavuođas, mun maid dávjá válddán iežan beatnaga Náste mielde. Dát lea hui buorre vuohki oažžut oktavuođa mánáiguin ja nuoraiguin

Háliida veahkehit sámi mánáid ja nuoraid

Johan muitala iežas sápmelašvuođa dagahan ahte identifisere SÁNAG árvvuiguin mii earret eará lea fállat kulturheivehuvvon divššu. Ja lohká ge SÁNAG sámi birrasa leahkit čilgehussan manin son dál háliida bargat dáppe.

-Dáppe oaččun vejolašvuođa váikkuhit veahkehit sámi mánáid ja nuoraid. Mun háliidan bargat sámi birrasis sápmelaččaiguin ja danin mun fárrejin davás Plassjii.

Johan doaivu šaddat miellagiddevažžan bargagoahtit terapevtan SÁNAG:s. Álggos manná olu áigi dieđusge oahpásmuvvat bargobáikái ja bargguide.

– Mun galggan earret eará Snåsa bargiin Per Martin Westerfjellain čuovvut girjebusse gos de besse deaivat lullisápmelaččaiguin eará ládje. Galggan maid fitnat Ruoŧabeale oaidnit ja oahppat, nu ahte jáhkán šaddat hui miellagiddevaš áiggi dál ovddos guvlui.