Ruoŧa ráđđehus oaččui raporta mas leat guorahallan sápmelaččaid psyhkalaš dili

Ođđasat SÁNAG:s

- Juohke nubbi nuorra sámi nisu Ruoŧas lohká alddis leamašan iešsorbmenjurdagat. Dát boahta ovdán ođđa raportas sápmelaččaid birra Ruoŧas.

 

Raporta čájeha oppalašgova sápmelaččaid psykososiala dearvvašvuođa dili birra, maid dál leat addán ruoŧa ráđđehussii. Ruoŧas leat vuosttaš geardde dál kárten dieđuid sápmelaččaid birra. Ja bohtosat suorggahit maiddái psyhkolaga ja prošeaktajođiheaddji Jon Petter Stoor. 

Sápmelaččat vásihit ahte sis lea heajut psykososiala dearvvašvuohta go majoritehtaálbmogis, nu čájeha raporta maid Ruota Sámediggi lea čađahan. Dál doaivu Sámedikki prošeaktajođiheaddji Jon Petter Stoor gii lea buohtastahttán dáid dieđuid raporttas ahte ráđđehus attášii Sámediggai doarjaga vai beasašedje bargat viidáseappot dáinna. – Mii dárbbašat eanet dutkosiid sápmelaččaid birra ja sápmelaččaiguin.


Prošeaktajođiheaddji Jon Petter Stoor

Raporta doaibma leamašan kártet, analyseret ja čalmmustahttit dieđuid sápmelaččaid psyhkalaš dearvvašvuođa birra, muhto raportas bohtet maiddái ovdán árvalusat doaibmabijuide mat buoridivččejit dearvvašvuođafálaldaga sápmelaččaide. Okta konkrehta evttohus lea ásahit sámi dearvvašvuođaguovddáža dahje bargat dan ovdii nannet dearvvašvuođabargiid máhttu sámikultuvrras. Dán čállá Ruoŧa Sámediggi iežas preassadieđáhusas.

Raporta čájeha ahte leat erehusat psyhkalaš dearvvašvuođadilis gaskkal ruoŧelaččaid ja sápmelaččaid. Muhttin gávdnosat raportas leat:

  • Juohke nubbi nuorra sámi nisu lohká alddis leamašan iešsorbmenjurdagat
  • Juohke goalmmát nuorra sámi boazodoalli lea veardidan dahje plánen iežas heakka váldit
  • Juohke nubbi nuorra sápmelaš lohka iežas vásihan čearddalaš vealaheami

Jon Petter Stoor dattetge deattuha ahte sápmelaččaid oktavuohta ja kultuvra lea nanus Ruoŧas, muhto raporta oaivemihttu lea čalmmusdahttit dearvvašvuođa dil ja váttisvuođaid. Su mihttu lea ahte raporta galggašii leat áddehahtti sihke sápmelaččaide ja earáide geaiguin lea beroštupmi dearvvašvuođasuorgái.

Raporta lea gávdnamis dušše ruoŧagillii.

Jon Petter Stoor lea bargan SÁNAG:s ovdal, dutkin ja psykologan. Čakčat son máhccá fas min lusa ja aigu bargagoahtit prošeavttain mas guorahallá iešsorbmema gaskkal nuorra almmáidolbmuid sihke norgga ja ruoŧabeale sámi.


Loga Ruoŧa Sámedikki raporta