Sámi dearvvašvuođasiida huksejuvvo Finnmárkku klinihka báldii

Sámi dearvvašvuođa siidda jurdda ja konseaptaraporta dohkkehuvvui cuoŋománu 26. Dan maŋŋá lágiduvvui Kárášjogaš bargobádji mas ulbmil lei oažžut buriid jurdagiid huksema hárrái bargiiguin ja luohttevašolbmuiguin.

 

​Bargobádjái serve bargit miehta organisašuvnna muhto eanaš oasseváldit gulle spesialistadoavttirguovddážii Kárášjohkii ja SÁNAG:ii.  Fáddá lei oččodit ovdán vuorjašumiid mat leat čadnojuvvon Sámi dearvvašvuođasiidda huksemii,  sihke eaŋkilolbmuiguin  ja organisašuvnnas.

Dál ráhkaduvvo nu gohčoduvvon totalentreprise- evttohus, mii mearkkaša ahte Finnmárkku buohcciviessu čilge ja bagada višuvnna ja mihttomeriid, gáibádusaid ja vuordámušaid maid vuođul entreprenevrrat hábmejit iežaset evttohusaid, čovdosiid, materiálaválggaid, designa, ovdánanplána ja hatti. Dan maŋŋil de beassá fálaldagaid bivdit. Go lea válljen fálaldaga de ovttasbargagoahtá entreprenevrrain ja geahččala optimaliseret prošeavtta. Leat ásahuvvon mielváikkuhemiidlávdegottit mat galget bearráigeahččat ja buktit oaivileaset dađistaga.

Fáktá

Spesialistadoavttirguovddáš Kárášjogas lea poliklinihkka mii gullá Klinihkka Hámmárfeasta vuollái. Fálaldat lea vuođđuduvvon fásta spesialisttaiguin ja johtti bálvalusaiguin. Fálaldat lea sámi pasieanttaid várás geat ásset sámi giellahálddašanguovllus (Guovdageaidnu, Porsáŋgu, Kárášjohka, Deatnu ja Unjárga), muhto buohkat geat háliidit divššodeami dáppe, ožžot dan.

Otne láigoha klinihkka divššodansaji somáhtalaš doaimmas Kárášjogas. Finnmárkku buohcciviessu hukse Sámi dearvvašvuođasiidda mii galgá sisttisdoallat sihke somáhtalaš doaimma ja rávisolbmuid psykiatriija poliklinihka (RPP)/ APAT.

Sámi dearvvašvuođasiidda stivrendokumeanta ja jurdda- ja konseaptadási mandáhtta dohkkehuvvui miessemánu 15. b. 2016. Ja de juolluduvvui 44 millijovnna ruvnnu huksemii. Finnmárkku buohcciviessu lea viiddidan dan ollislaš rámma guđain millijovnnain sirdin dihte RPP ja APAT Leavnnjas Kárášjohkii.

Ovddasmannanplána

Jurdda- ja konseaptadássi lea dohkkehuvvon Finnmárkku buohcciviesu stivrra bokte cuoŋománu 2017
Bargobádji ja mielváikkuheapmi čađahuvvon miessemánu 2017
Rahkadit totalentreprise- evttohusa
Fálaldatdássi
Árvvoštallan ja šiehtadallandássi
Ovttasdoaibman vuosttas dássi: Optimaliseret prošeavtta
Ovttasdoaibman nubbi dássi: detáljaprošeakta ja huksen, huksen álgá golggotmánu 2017
Finnmárkku buohcciviessu váldá badjelasat huksehusa
Reaidomonteren
Doaibmaiskkadeapmi ja geahččalandoaibma
Váldit atnui huksehusa