Sámi našuvnnalaš geavaheddjiid ráđđi lea ásahuvvon

Sámi geavaheddjiidovddasteddjiid oktasaščoahkkimis Romssas skábmamánu 2.beaivvi ásahuvvui Sámi našuvnnalaš geavaheddjiidráđđi.

Sámi našuvnnalaš geavaheddjiid ráđđi Gunn Heattain, Tove Laitin ja Renathe A. Simonsenin

SÁNAG ja sámi geavaheddjiidovddasteaddjit čadnojuvvon iešguđetge dearvvašvuođa lágádusaide Davvi Dearvvašvuođas ásahedje oktasaš Sámi našuvnnalaš geavaheddjiidráđi. Ráđi bargu lea nannet sámi vuoigatvuođaid dearvvašvuođa- ja fuolahussuorggis.

SÁNAG geavaheddjiidráđđi ja Sámi geavaheddjiidovddasteaddjit čadnojuvvon Davvi Dearvvašvuhtii dolle oktasaščoahkkima Romssas, maiddái SÁNAG jođiheaddji Gunn Heatta searvvai čoahkkimii. Ulbmil čoahkkimiin lei čohkket buot sámi geavaheddjiidovddasteddjiid mat leat čadnojuvvon Davvi Dearvvašvuođa guvlui. Čoahkkimis mearridedje ásahit sámi našuvnnalaš geavaheaddjiráđi.

Čoahkkimis digaštalle mo buoremusat rekrutteret sámi geavaheddjiid ja mo sin galgá buoremusat ávkkástallat. Muhtimat leat ožžon njuolga gažaldaga searvat ja earát ges leat nammaduvvon geavaheddjiidservviid bokte.

Ovddidit áššiid našunalalaččat

Geavaheaddjidovddasteaddjit geat nammaduvvojit servviid bokte ožžot doarjaga searvvis. Sámi geavaheddjiidovddasteddjiin olggobeale geavaheddjiidservviid váilo sullasaš vejolašvuohta oččodit ráđiid ja doarjaga, muitala Gunn Heatta. Sámi našuvnnalaš geavaheddjiid ráđi ulbmil leage fállat buoret fierpmádaga sámi geavaheddjiide. Sámi našuvnnalaš geavaheddjiid ráđđi mii maid fátmmasta SÁNAG geavaheddjiidráđi galgá ovttasbargagoahtit SÁNAG:n. Ráđđi galgá earret eará ovddidit sámi áššiid ja beroštumiid našuvnnalaš dearvvašvuođaforain. Vai oažžut buoremus lági mielde dieđuid áššiid birra mat dáhpáhuvvet olggobeale Davvi Dearvvašvuođa de háliidat mii fátmmastit maiddái geavaheddjiidovddasteddjiid spesialista- ja gielddadearvvašvuođabálvalusas gullevačča eará dearvvašvuođaguovlluide.

Sii geat leat nammaduvvon miellahttun ođđa sámi našuvnnalaš geavaheddjiidráđđái leat;
Else Marie Isaksen (Regionalt brukerråd Helse Nord RHF/Finnmarkssykehusets Brukerutvalg)
Nina Nedrejord (Brukerutvalget UNN)
Inga Karlsen (Brukerutvalget Nordlandssykehuset HF)
Marit Madsen (samisk vara, Brukerutvalget Nordlandssykehuset HF)
Ellen Sara Sparrok Larsen (Brukerutvalget Helgelandssykehuset HF)
Tom-Kristian Hermo (SANKS Brukerråd)
Piere Bergkvist (SANKS brukerråd)
Elen Ravna (SANKS brukerråd)
June Gerd A. Johnsen (SANKS brukerråd)
Ingrid Jåma (SANKS brukerråd).