SÁNAG veahkeha “ADHD OMEGA 3” dutkosa čađaheapmái

Mánáid- ja nuoraidpsykiatriija poliklinihkka SÁNAG:s veahkeha čađahit dutkosa "ADHD OMEGA 3". Dutkosa ulbmil lea guorahallat váikkuha go omega-3 ADHD ja ADD dovdomearkkaide.   

Stipendiáhtta ja váldodoavttir Judeson Joseph ja dutkanbuohccidivššár olgeš bealde dá čuččodeaba SÁNAG bargiiguin.

​Omega-3 lea biebmanlasáhus ja mii sisttisdoallá buoidesivra. Omd. leat guolis ja bohccobierggus omega-3. Omega-3 lea dárbbašlaš jierbmái ja dan ovdánahttimii ja lea maid dehálaš eastadan dihte váibmo/kar-dávddaid muitala stipendiáhtta ja váldodoavttir Judeson Joseph.

Hearkkes mánát nugo mánát mat leat beare árrat šaddan dahje unna mánát riegádanagi ektui dárbbašit lassibiebmu mas lea omega-3, vai buoridivčče jierbmi šaddama. Mii diehtit ahte stuorra oassi mánáin geain lea ADHD lea unnán omega-3 gorudis. Dása mii eat dieđe riektá vástádusa čilge Joseph. Leage justa danin mii dál háliidat dutkat dan birra. Leat ovdalaččas dahkkon dutkosat muhto eai leat leamašan ná stuorra ja viidát.

Joseph joatká muitaleames ahte omega-3 lea dehálaš jierbmi ovdánahttimii ja doibmii. Ja ADHD /ADD ges lea muhtin lágan muosáhus jierbmi ovdánahttimis ja funkšuvnnas. Dát dutkos dáhttu ge gávnnahit sáhtášii go omega-3 unnidit ADHD/ADD dovdomearkkaid mánáiguin ja nuoraiguin geat eai váldde dálkasiid.

SÁNAG Kárášjohka šaddá dutkanguovddáš

Helse Nord lea ruhtadan prošeavtta ja dat mielddisbuktá ahte dutkagohtet Davvi-Norgga álbmoga. Joseph háliida lihkká deattuhit ahte dutkos lea maiddái rabas earáide Norggas, geat háliidit searvat dása.
UNN lea váldosponsor ja danin leage Romsii ásahuvvon vuosttaš dutkanguovddáš. Prošeakta ásaha dutkanguovddáža Nordlándii ja Finnmárkui maid. Guovddážat šaddet Bådåddjoi ja Kárášjohkii.

Diđoštallanmátkkis Kárášjogas

Stipendiáhtta Judeson Joseph lea fitnan dán vahkos diđoštallanmátkkis Kárášjogas ovttas dutkanbuohccidivššárin Kristin Jenssenin ja prošeaktajođiheaddjin professor Siv Kvernmoin. Diđoštallanmátkkis fitne oahpásmuvvan ja oaidnin dihte mo SÁNAG:s doaibmá dat klinihkalaš árgabeaivi muitala Kvernmo. Mii beassat oaidnit mo dáppe lea ja gullat makkár rutiinnat lea omd. vai diehtit makkár dutkanrusttegiid galgat deike háhkat. Dáinna lágiin beassat mii ráhkkanit ásaheapmái mii doaivumis dáhpáhuvvo maŋŋil geasseluomu muitala Kvernmo.

Prošeaktaovddasvástideaddjit fárrolaga SÁNAG koordináhtoriiguin.
Prošeaktaovddasvástideaddjit fárrolaga SÁNAG koordináhtoriiguin.

Háliidat go searvat dutkosii dahje diehtit eanet?

Loga UNN.no siidduin prošeavtta birra.

Geahča maid oasseváldi muitala searvama birra (NRK Troms ášši).