SÁNAGis fitne ruoššabeale guossit

Gaskavahkku fitne Kárášjogas guossit Sakha-guovllus Ruoššas. Joavku lei mátkkošteame Davvi-Norggas oahppan dihte mo dearvvašvuođabálvalusat doaimmahuvvojit boaittobealguovlluin.

 

​Guossit gallededje SÁNAGa Kárášjogas gaskavahkku. Sis lei dáhttu oahpásmuvvat SÁNAGa doibmii ja bálvalusaide ja sii háldiidedje erenoamážit gullat mo SÁNAG láhča iežas bálvalusaid sápmelaččaide. Galledeapmi lágiduvvui fárrolaga Árktalaš ja globálalaš dearvvašvuođaguovddážiin Romssas (Senter for arktisk og global helse (SAG) ved Institutt for samfunnsmedisin ved UiT).

Guossit ledje fágaolbmot guoskevačča The Territorial Fund of Compulsory Medical Insurance, Sakha republihkas Ruoššas ja sii ledje: Rozaliia Vasileva, Liudmila Novikova og Arian Ermolaev. Sii leat mátkkoštan sihke Romssas ja Finnmarkkus oahppan dihte mo Norggas organiserejuvvojit boaittobealguovlluid dearvvašvuođabálvalusat ja erenoamážit makkár bálvalusat fállojuvvojit sápmelaččaide.

SÁNAGA bálvalusat

SÁNAGa beales vuhtiiválde gussiid Anne Silviken, Tonje Samuelsen, Arnhild Somby, Aleksandra Somby, Nataliia Shagabutdinova ja Renathe Simonsen.

Arnhild ja Tonje doalaiga sátnevuoru mas čilgiiga oanehaččat earret eará sámi historjjá birra, spesialistadearvvašvuođabálvalusaid birra Finnmárkkus. Soai muitaleigga min psyhkalaš dearvvašvuođasuddjen ja gárrendilledivššu bálvalusaid birra ja maiddái min dearvvašvuođa siidda plánaid birra. Váldodeaddu lei muitalit makkár fálaldagat SÁNAGis leat sápmelaččaide Norggas.

Dán gálledeapmái besse maiddái váldit atnui SÁNAGa guovtti fágabargi ruoššagiela gelbbolašvuođa, go Aleksandra ja Nataliia dulkuiga čoahkkima ja maiddái čilgiiga SÁNAGa doaimma.

Árktalaš dearvvašvuođasuddjen

Joavku muitalii ahte sis lea plána ásahit Árktalaš dearvvašuođasuddjema ruoššabeale, mii galgá doaibmat lassin Ruošša dearvvašvuođabálvalusain. Guossit liikojedje ge go besse gullat ja oahppat mo SÁNAGis leat bargan hukset sámi ásahusa, sihke lágalaččat, organisatoralaččat ja bálvalusaid ektui. Dáid dieđuid lohke stuorrá ávkin go máhccet fas ruoktot.

Veahá duogášdieđut

Sakha republihkka lea mangga geardde stuorát go Norgga eana, ja doppe ásset vuollel millijovnna ássi. Eanaš oassi álbmogis leat jakutat. Olusat ellet árbevirolaččat mas boazodoallu ja guolásteapmi lea vuođđun. Sis leat olu dat seamma hástalusat go Finnmárkkus ja erenoamážit dasa mii guoská boaittobealeguovlluid dearvvašvuođabálvalusaide.