Journálageahčadeapmi

Vuoigatvuohta geahčadit iežas pasieantajournála

Davvi Dearvvašvuođa pasieanttat besset digitálalaččat iežaset pasieantajournálii nationála dearvvašvuođaportála www.helsenorge.no bokte.

​Geahčadeapmi:

Don sáhtát iežat buohcciviessojournála geahččat interneahtas almmolaš dearvvašvuođaportála bokte helsenorge.no. Doppe almmuhuvvojit journáladokumeanttat mat leat čállojuvvon čakčamánu 21.beaivvi 2015 rájes.

Don sáhtát bivdit ahte boarráset dokumeanttat galget gávdnanláhkái elektrovnnalaččat.
Sáhtát bivdit beassat geahčadit journáladokumeanttaid mat eai leat gávdnanláhkái elektrovnnalaččat, go dain oaččut kopiija.

Pasieanttas lea dábálaččat vuoigatvuohta geahčadit iežas journála mildosiiguin ja sus lea maid vuoigatvuohta oažžut kopiija. Mildosiiguin oaivvildit røntgengovaid, dikšunplánaid, kardexa, modeallaid ja eará mii ii čállojuvvo njuolga journálii. Pasieanttas lea vuoigatvuohta jearrama vuođul oažžut álkis ja oanehis čilgehusa fágacealkagiidda ja sullasaččaide mat leat adnon journálas.

Njulgen ja sihkkun:

Pasieantta- ja geavaheaddjivuoigatvuođalága § 5 – 2 mielde lea pasieanttas dahje sus geasa dieđut gusket vuoigatvuohta gáibidit ahte dieđut mat leat journálas njulgejuvvojit dahje sihkkojuvvojit. Njulgema ja sihkkuma eavttut:

  • Njulgen (dearvvašvuođabargiidláhka § 42): Sáhttá njulget boasttudieđuid, váilevaš dahje heivetmeahttun dieđuid dahje cealkámušaid mat leat journálas. Njulgen galgá dahkkot nu ahte journála čállojuvvo ođđasit dahje ahte dahkko beaiváduvvon lasáhus journálii. Njulgemis ii galgga sihkkut dieđuid dahje cealkámušaid.
  • Sihkkun (dearvvašvuođabargiidláhka § 43): Sihkkun eaktuda eandalii gáibádusa ahte sihkkun galgá leat "riekta dábálaš deasttaid dáfus" ja ahte dieđut leat juogo: boastut dahje vearut ja leat noađđin sutnje geasa dat gullet, dahje mat vissásit eai leat dárbbašlaččat go galgá addit pasientii dearvvašvuođaveahki.

Njulgen- dahje sihkkungáibádusa galgá čálalaččat ovddidit Finnmárkku buohccivissui. Finnmárkku buohcciviesu personsuodjalanáittardeddjiin sáhttá váldit oktavuođa oažžun dihte sus rávvagiid ja bagadallama. Njulgen- dahje sihkkunbiehttaleami sáhttá váidit Fylkkamánnii.

Gidden:

Pasieanta sáhttá vissis eavttuid vuođul bivdit ahte ii beasa geahčadit olles journála dahje osiid journálas. Dát sáhttá ovdamearkka dihte leat ahte vissis olbmot eai galgga beassat dan geahčadit dahje ahte ii beasa geahčadit vissis dokumeanttaid. Pasieanta ferte váldit ovddasvástádusa dasa ahte dearvvašvuođaveahki kvalitehta sáhttá hedjonit go gidden mielddisbuktá váilevaš geahčadanvejolašvuohta. Giddengáibádusa galgá čálalaččat ovddidit Finnmárkku buohccivissui. Finnmárkku buohcciviesu personsuodjalanáittardeddjiin sáhttá váldit oktavuođa oažžun dihte sus rávvagiid ja bagadallama.  Giddenbiehttaleami sáhttá váidit Fylkkamánnii.

Vuolábealde gávnnat skoviid maid fertet vissis dilálašvuođain atnit:

Skovvi vai oažžu rahppojuvvot boarráset journáladokumeanttaid helsenorge.no digitála čovdosis (dárogillii) Skovvi mainna bivdá njulgema dahje sihkkuma (dárogilii) Skovvi mainna bivdá giddema (dárogillii) Skovvi mainna bivdá geahčadanlogga (dárogillii) Skovvi mainna bivdá journála sáddejuvvot báberhámis dahje CD:s (dárogillii)

Eanet dieđut čujuhusas helsenorge.no

Pasientajournála ja geahčadeapmi (helsenorge.no – dárogillii)